རབ་བྱུང་བཅུ་གཉིས་པའི་ས་བྱ་ལོ་སྟེ་ཕྱི་ལོ ༡༧༢༩ ལོར་སྡེ་དགེ་ཆོས་རྒྱལ་ཞེ་གཉིས་པ་བསྟན་པ་ཚེ་རིང་མཆོག་སྡེ་དགེ་བཀའ་འགྱུར་གྱི་འཆར་འགོད་མཛད་རིམ་གཟིགས་སྐྱོང་གི་བདག་རྐྱེན་བླ་ན་མེད་པའི་ཐུགས་ཁུར་ཚུལ་བཞིན་མཛད་པའི་ལས་རིམ་ནང་༸སྐྱབས་མགོན་སི་ཏུ་པཎ་ཆེན་ཆོས་ཀྱི་འབྱུང་གནས་མཆོག་གིས་སྡེ་དགེ་བཀའ་འགྱུར་དེ་ཉིད་ཀྱི་ཞུ་ཆེན་པའི་མཛད་ཁུར་བླ་མེད་མཛད་པས་རྗེས་འཇུག་སློབ་འབངས་རྣམས་ལ་བཀའ་དྲིན་ཟླ་མེད་དུ་བསྐྱངས། འདི་ཉིད་ལི་ཐང་བཀའ་འགྱུར་ལ་གཙོ་བོར་གཞི་བཅོལ་ཞིང་ལོ་ཡུན་ལྔའི་རིང་མཛད་འཕྲིན་བར་མེད་དུ་ཐུགས་འཁུར་བསྐྱངས་རྗེས་ཕྱི་ལོ་ ༡༧༣༣ ལོར་མཇུག་ལེགས་པར་གྲུབ། སྡེ་དགེ་འཀའ་འགྱུར་འདི་ཉིད་ལ་པོད་གྲངས་བརྒྱ་དང་གསུམ་དུ་བཞུགས་ཤིང་། འདི་ཉིད་ལ་སྡེབ་ནོར་སོགས་ཀྱི་འཁྲུལ་པ་དང་བྲལ་བས་རིས་མེད་གྲུབ་མཐའ་ཀུན་གྱིས་མ་དཔེ་འདི་ཉིད་ཚད་ཐུབ་ཏུ་ངོས་འཛིན་མཛད་བཞིན་པ་ཡིན།

སྡེ་དགེ་བཀའ་འགྱུར་གྱི་གོ་རིམ་གཤམ་གསལ་ལྟར།

བོད་རབ་བྱུང་བཅོ་ལྔ་པའི་ལྕགས་སྤྲེལ་ཕྱི་ལོ་ ༡༩༢༠ ལོར་༸གོང་ས་༸རྒྱལ་དབང་བཅུ་གསུམ་པ་མཆོག་ལ། སྒོ་ལྕོག་སྤྲུལ་སྐུ་ངེས་དོན་བསྟན་འཛིན་ཆོས་ཀྱི་དབང་པོ་ནས་གསོལ་བ་བཏབ་པ་ལྟར་སྣར་ཐང་པར་མ་དང་རྒྱལ་རྩེའི་ཐེམ་སྤང་མ། སྡེ་དགེའི་བཀའ་འགྱུར་མ་དཔེ་ཁུངས་ཐུབ་རྣམས་གཞིར་བཟུང་ནས་ལྷ་ལྡན་དུ་པར་དུ་བཞེངས་པའི་དབུ་བརྩམས་པ་ཕྱིས་རྒྱལ་ཚབ་རྭ་སྒྲེང་རིན་པོ་ཆེ་དང་རྒྱལ་བའི་གཅུང་སྲིད་བློན་ཀུན་དགའ་དབང་ཕྱུག་རྣམ་གཉིས་ཀྱིས་འཕྲོ་སྐྱོང་མཛད་པར་བརྟེན་རབ་བྱུང་བཅུ་དྲུག་པའི་ཤིང་ཁྱི་སྤྱི་ལོ་ ༡༩༣༤ ལོར་བཀའ་འགྱུར་པོད་གྲངས་ ༡༠༠ པར་གཞི་ཆ་ཚང་བཞེངས་ཏེ་ལེགས་པར་གྲུབ་པ་ཕོ་བྲང་པོ་ཏ་ལའི་འདབས་ཞོལ་གངས་ཅན་ཕན་བདེའི་གཏེར་མཛོད་གླིང་དུ་བཞུགས་པ་ལ་ཞོལ་ལམ་ཡོངས་གྲགས་སུ་ལྷ་ས་བཀའ་འགྱུར་ཞེས་ཟེར་རོ།།  ​དེ་ཡང་པར་གཞི་འདི་ལ་མཚན་ཞབས་སྟག་བྲག་སྤྲུལ་སྐུ་ངག་དབང་གསུང་རབ་མཐུ་ཐོབ་བསྟན་པའི་རྒྱལ་མཚན་དང་མཚན་ཞབས་ཚ་སྤྲུལ་ངག་དབང་བློ་བཟང་སོགས་མཁས་དབང་དུ་མས་ཞུས་དག་ལེགས་པར་མཛད་ཅིང་། ད་དུང་མཚན་ཞབས་པ་རྣམ་གཉིས་ཀྱིས་འདིའི་དཀར་ཆག །བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོའི་བཀའ་གངས་ཅན་འདིར་འགྱུར་རོ་ཅོག་གི་གསུང་པར་འཛམ་གླིང་སྤྱི་ནོར་གྱི་དཀར་ཆག་ལེགས་བཤད་འཕྲུལ་གྱི་ལྡེ་མིག་ཅེས་པའང་མཛད་དོ། །

ལྷ་ས་བཀའ་འགྱུར་གྱི་གོ་རིམ་གཤམ་གསལ་ལྟར།